តួនាទីរបស់អង្គការស៊ី-ដ គឺដើម្បីធ្វើការពិនិត្យសង្កេត និងលើកកម្ពស់ការអនុវត្តអនុសញ្ញាស៊ី-ដ នៅកម្ពុជា និងដើម្បីចូលរួមចំណែកក្នុងការតស៊ូមតិ បន្ទាប់ពីបានធ្វើការបោះពុម្ភផ្សាយរបាយការណ៍ស្រមោល នៃអង្គការមិនមែនរដ្ឋាភិបាលកម្ពុជា។ បច្ចុប្បន្ន អង្គការស៊ី-ដ ជាសម្ព័ន្ធអង្គការដែលមានអង្គការមិនមែនរដ្ឋាភិបាលកម្ពុជាជាង ៣០ចូលរួម និងមានបណ្តាញការងារសំខាន់ៗ ដែលធ្វើការផ្តោតទៅលើវឌ្ឍនភាពរបស់ស្រ្តី។ អង្គការស៊ី-ដ មានមូលដ្ឋានរឹងមាំក្នុងការអនុវត្តការងារលើកកម្ពស់ការយល់ដឹង និងការអនុវត្តសកម្មភាពនានាដើម្បីកសាងសមត្ថភាពសមាជិករបស់ខ្លួន។ អង្គការស៊ី-ដ ក៏បានរៀបចំវគ្គបណ្តុះបណ្តាលជាទៀងទាត់ស្តីពីអនុសញ្ញាស៊ី-ដរ ដល់សិស្សនិស្សិត បុគ្គលិកអង្គការមិនមែនរដ្ឋាភិបាល និងមន្រ្តីរដ្ឋាភិបាល។ អង្គការស៊ី-ដ មានបទពិសោធន៍ច្បាស់លាស់ក្នុងការងារគ្រប់គ្រងកម្មវីធីគម្រោងប្រកបដោយប្រសិទ្ធភាព។

អង្គការស៊ី-ដ ក៏បានបង្កើតទំនាក់ទំនងល្អជាមួយរដ្ឋាភិបាលកម្ពុជាផងដែរ។ លទ្ធផលសំខាន់ៗ ដែលកើតចេញពីកិច្ចសហការទាំងនេះ មានដូចជា អនុសាសន៍ជាច្រើនរបស់យើងត្រូវបានទទួលយក និងដាក់បញ្ចូលក្នុងរបាយការណ៍ផ្លូវការរបស់រដ្ឋាភិបាលស្តីពីការអនុវត្តអនុសញ្ញាស៊ី-ដ និងមានឥទ្ធិពលលើសេចក្តីសម្រេចនៃក្រសួងកិច្ចការនារី ក្នុងការអនុម័តច្បាប់ ស្តីពី ការទប់ស្កាត់អំពើហិង្សាក្នុងគ្រួសារ និងកិច្ចការពារជនរងគ្រោះ ឆ្នាំ២០០៥ ព្រមទាំងច្បាប់ស្តីពីការបង្ក្រាបអំពើជួញដូរមនុស្ស និងអំពើធ្វើអាជីវកម្មផ្លូវភេទ       ឆ្នាំ២០០៨។ ជាការឆ្លើយតបចំពោះការតស៊ូមតិពីអង្គការស៊ី-ដ ក្រសួងមហាផ្ទៃ បានសម្រេចអនុម័តប្រព័ន្ធចុះបញ្ជីអត្រានុកូលដ្ឋាន ដែលមានលក្ខណៈសម្រួលដល់ប្រជាពលរដ្ឋ។ ដោយមានការតឿនរំលឹករបស់អង្គការស៊ី-ដ រដ្ឋសភាក៏បានផ្តល់សច្ចាប័នជាស្ថាពរលើពិធីសារបន្ថែមស្តីពីអនុសញ្ញាស៊ី-ដ ក្នុងឆ្នាំ២០១០។ នាពេលថ្មីៗកន្លងទៅនេះ អង្គការស៊ី-ដបានធ្វើការជាមួយរដ្ឋាភិបាល ដើម្បីផ្តល់អនុសាសន៍លើការធ្វើវិសោធនកម្មនៃច្បាប់ស្តីពីអំពើហិង្សាក្នុងគ្រួសារ។